كتبت: علياء الهواري
وسط زحام من الوفود العربية والشباب أمام ضريح الزعيم جمال عبد الناصر، وقف المؤرخ المعروف الدكتور جمال شقرة ليضع يده على ما وصفه بالظاهرة التي تستحق الدراسة.
وقال شقرة في حديث خاص عندما سألناه عن رسالته اليوم تكملة لرسالة عبد الناصر حول فلسطين: المشهد وحده كفاية، لما تشوفي فلسطينيين وليبيين ويمنيين جايين مخصوص، ولما تشوفي شباب صغير لم ير عبد الناصر ولم يعش عصره جاي كل سنة للضريح، ده معناه إن المشروع النهضوي العربي القومي اللي طرحه جمال عبد الناصر مشروع سليم وصحيح.
وأضاف أستاذ التاريخ: أنا كمؤرخ لما بجمع المشاهد اللي بتحضر هنا كل سنة بتأكد إنه استحق المكانة دي في قلوب الناس لأنه انحاز للطبقة الوسطى والفقراء وانحاز لكل حركات التحرر الوطني، عشان كده في كل دولة أفريقية هتلاقي شارع باسمه ومدرسة باسمه وناس لحد النهاردة بتدعي له في ذكراه.
وكشف شقرة عن مفاجأة سارة حدثت خلال الإعداد لمؤتمر رؤية الشباب لتجربة جمال عبد الناصر، حيث قال: فوجئت بعدد كبير جدا من الشباب اللي ما شافوش عبد الناصر بيراسلني ومصرين يشتركوا ويقدموا أوراق بحثية ويقولوا كلمة، ده شيء رائع جدا وبيأكد إن مبادئ جمال عبد الناصر لسه حية وأهميتها بتزيد مع الوقت.
